پاکستان میں خواتین کے لئے جنت کا ٹکٹ حاصل کرنے کی دس معاشرتی شرائط

آپ نے تمام عمر لڑکوں سے بات نہیں کی، نہ صرف یہ کہ ان سے پردہ کیا بلکہ ان کی طرف کبھی نگاہ بھی نہیں اٹھائی

آپ نے صرف لڑکیوں کے اداروں میں تعلیم حاصل کی، ایسی تمام درسگاہوں کو بری نظر سے دیکھا جہاں لڑکے اورلڑکیاں ایک ساتھ پڑھتے تھے

آپ نے گھر سے درسگاہ تک کا سفر کسی سواری میں یا اکیلے ایسے طے کیا جیسے ارد گرد کی دنیا آپ کی دشمن ہے اور آپ کو ایک خوف نے سارا راستہ گھیرے رکھا

آپ نے اپنی درسگاہ میں موجود مرد ملازمین سے بھی بات نہیں کی اور درسگاہ کے اندر بھی آپ نے کبھی دوپٹہ سر سے سرکنے نہیں دیا

آپ نے تعلیم حاصل کرنے کے بعد نوکری کرنے کا کبھی نہیں سوچا

آپ نے بزرگوں کی پسند پر آنکھیں ناک اور کان سب بند رکھتے ہوءے شادی کی

آپ نے شوہر اور سسرال کی مرضی کے مطابق زندگی بسر کی اور بچے پیدا کیے

آپ نے اپنے بچوں اوربچیوں کی پرورش میں واضح فرق روارکھا

آپ نے کبھی اپنی کسی خواہش کی پیروی نہیں کی اور جو کچھ شوہر نے لا کر دیا اس کو دنیا کی قیمتی ترین چیز جانا

آپ نے تا دمِ مرگ اپنے شوہر کی ہر طرح کی ذیادتی  پر نہ صرف پردہ ڈالا بلکہ اس سے کبھی شکوہ تک نہیں کیا 

میرا گھر میری جنت

جب بھی کوئِ مجھ سے سوال کرتا ہے تو میں ببانگ دہل کہتی ہوں میں یقینا پاکستان واپس جائوں گی اور کوئی وجہ نہیں ہے کہ میں اپنا ملک چھوڑ دوں۔ میں نے تمام تر محنت اپنے ملک اور لوگوں کے لئے کچھ کر پانے کی غرض سے کی ہے۔ ،میرا قطعا کوئی اور مقصد ہی نہیں تھا اس تمام تر کاوش کا۔ 

 لیکن کچھ عرصہ سے میں نے اپنے آپ میں ایک تبدیلی محسوس کی ہے۔ جب بھی میرا کوءی عزیز، دوست یا رشتہ دار مجھ سے مشورہ مانگتا ہے تو میں کہتی ہوں جہاں آپ کے لیے بہتر ہو، جہاں آپ اور آپ کے گھر والوں کی جان،مال اور عزت محفوظ ہوں وہاں رہئے۔ ہم پر سب سے پہلے ہمارے اپنوں کا حق ہوتا ہے۔ 

میں یقینا پاکستان جاءوں گی وہاں رہ کر اپنی سی بھر پورکوشش کروں گی کہ میں اپنی جنت جیسی سر زمین کو ایک بار پھر امن و آشتی کا گہوارا بنائوں ۔۔۔لیکن میں ٹارگٹ کلنگ، دہشت گردی، غنڈہ گردی، ظلم و بربریت،مزہبی اور فرقہ وارانہ فسادات کے بڑھتے ہوءے ان رجحانات سے آنکھیں بند نہیں رکھ سکتی۔ میں اپنے پیاروں کو یہ مشورہ نہیں دے پاتی کہ جاءو اور بغیر کسی قصور کے کسی کی نفرت کی بھینٹ چڑح جاءو۔ 

میری دعا ہے کہ میں اور مجھ جیسے لوگ جو انسانیت سے پیار کرتے ہیں، جو اپنے ساتھ ساتھ اپنے سے مختلف لوگوں کو بھی جینے کا حق دیتے ہیں اس ملک خدا داد کو لوگوں کے لئے سچ میں جنت بنا سکیں۔۔۔اور فخر اور اعتماد سے اپنے پیاروں کو اپنے گھر واپس بلا سکیں۔۔۔ آمین